الصيدلى الصغير

شارك معنا وابدع


    أمي .. صفصافة الحنين

    شاطر

    دكتور احمد طه
    مدير المنتدى
    مدير المنتدى

    ذكر

    عدد المساهمات : 1454
    تاريخ التسجيل : 25/02/2010
    العمر : 35
    الموقع الموقع : مصر ام الدنيا

    جديد أمي .. صفصافة الحنين

    مُساهمة من طرف دكتور احمد طه في الجمعة أبريل 16, 2010 11:13 pm


    جبتلوا كلمات لابوبسملة
    جوز اختى
    يارب تعجبكو
    اكيد هتعجبكو

    أمي .. صفصافة الحنين

    الإهداء :
    إلى أمي الحبيبة وإلى كل أمهات النهر.

    يا الحمام
    نقطة ع السطر ... وسلام
    خد كفايتك من حروفي
    نور وشوق
    وإنتشي بلمسة كفوفي
    و إعلى فوق
    أعلى من هم الزحام
    أعلى من شوقي إللى هام
    واتلضم بين الغمام
    بين قساوتي واشتياقي
    .... والسنين
    أعلى من حتى الكلام
    إللى منقوش ف الرسايل
    بين هديلك وإللي باقي
    من بواقي المحرومين
    يا الحمام ...
    ( للمتانيا )
    شد مكتوبي المحمل
    بالأماني والغناوي
    لأمي صفصافة الحنين
    ** ** **
    يا الحمام
    قول ف أول سطر كيفك
    عامل أيه يا أماية وقتك
    لسة بتحدي رغيفك
    بالرموش العشمانين
    في الرضا ساعة الأدان
    لسة بتمدي لرغيفك
    غنوة الصبح المبلل
    بالعرق وسط الغيطان
    لسة بتهادي الجيران
    بالخبيز وغموس محبة
    والمدى ضلة أمان
    لسة بتحني الصبايا
    وتخرمي ودان البنات
    لسة بتملي الرحايا
    سر منطوق السكات
    لسة عايشة ف حضن أبويا
    رغم بيقولوا إنه مات
    لسة بتلمي الحقايق
    ع الحقايق م الشتات
    لسة بتقولي إبن بطني
    الواد محمد لحمه ني
    لسة م السقف المشقق
    القمر بيمد ضي
    يروي مجروح السواقي
    حبة نور والباقي مي
    تطرح الأرض الشراقي
    كسوة العيد إللي جي
    ** ** **
    يا الحمام ...
    قول لست الحزن هانت
    والأدان قرب ينادي
    قول لها البشارة بانت
    يمكن الطرح السنادي
    بس عارفة ... كني خايف
    لليمام تاخده الحدادي
    للغيطان إللي الهالوك
    فيها قتله الغلة عادي
    ...عاملة أيه يامة الغيطان
    بعد ما دقوا الحديد
    آل صحيح طرحت مناجل
    بعدما إتروت مبيد
    والنخيل ساعة أما تدن
    لسة بيطاطي الجريد
    ولا راخر ريحه رخيت
    و إتكسى بروح العبيد
    أوعى يامة يكونوا ملوا
    إنتظار بكرة البعيد
    أوعى يامة يكونوا ضلوا
    وبدلو النيل با لصديد
    علميهم زى عادتك
    إن فينا شئ وحيد
    يوم ما تشتد الشدايد
    قلبنا واحد شديد
    ** ** **
    يا الحمام ...
    حط ع التوتة العفية
    وانده القلب المداوي
    وأحرتي يا مة القسية
    واشتلي صوت الغناوي
    فيييييين حواديتك وفيني
    صدقيني أنا لسة غاوي
    لمة ع اللقمة الهنية
    وشربة م القلة القناوي
    يا الحمام بالله تهم
    بوس إيد أمي وكل أم
    أم طه وأم تادرس
    كل أم أحضن وضم
    قول لست الحزن فرحك
    ع الشجر زهر خلاص
    قول لها بالقلب سامعك
    من زمن سبت(الخلاص)
    بس طمعان تبعتيلي
    دعوتين متكلفين
    من بتوع الفجر يا مة
    ينجدوا القلب الحزين
    أصلنا ف الغربة يامة
    يا مجروحين ...... يا موجوعين
    ويا الحمام ... في الختام
    نقطة عالسطر ... وسلام

    محمد عبد الرحمن حجازي


    [ندعوك للتسجيل في المنتدى أو التعريف بنفسك لمعاينة هذه الصورة]







    [ندعوك للتسجيل في المنتدى أو التعريف بنفسك لمعاينة هذه الصورة]
    [ندعوك للتسجيل في المنتدى أو التعريف بنفسك لمعاينة هذه الصورة]

    [ندعوك للتسجيل في المنتدى أو التعريف بنفسك لمعاينة هذه الصورة]

    drmero
    مراقبة عام
    مراقبة عام

    انثى

    عدد المساهمات : 677
    تاريخ التسجيل : 01/03/2010

    جديد رد: أمي .. صفصافة الحنين

    مُساهمة من طرف drmero في السبت أبريل 17, 2010 12:54 am

    فعلا كلمات جميله
    حاسه انه متاثر بالابنودى
    [ندعوك للتسجيل في المنتدى أو التعريف بنفسك لمعاينة هذه الصورة] وشكرا ليك د\ احمد ولابو بسمله
    فعلا عنده موهبه جميله

      الوقت/التاريخ الآن هو السبت ديسمبر 10, 2016 6:46 pm